Acantha Lang (USA) en Santiago - DIA DE LA MUJER

Nada en Nova Orleáns, Luisiana, Acantha Lang ten desde o berce soul e blues correndo polas súas veas, e un amplo rexistro vocal con matices moi recoñecibles, influenciado polas lendarias Aretha Franklin, Mavis Staples e Nina Simone.
Desde Nova Orleáns trasladouse a Nova York, onde empezou a destacar grazas á súa prodixiosa voz no escenario do famoso Harlem Grill, punto de reunión dos mellores artistas de soul da cidade. Despois diso, mudouse a Londres para encabezar o cartel da sede londiniense do famoso club orixinario de Manhattan The Box, alcanzando unha gran notoriedade no circuíto británico de actuacións en vivo.
É tamén unha compositora consumada. A súa canción Gonna Be All Right foi incluída no álbum Got Soul, de Robert Randolph & The Family Band, candidato aos premios Grammy 2017.
O seu traballo de debut, un EP titulado Sugar Woman, foi seleccionado pola publicación especializada Soul Tracks como álbum destacado do mes tras o seu lanzamento en agosto de 2021; e tamén lle valeu o premio The New Artist of the Year para os Soul Tracks Readers' Choice Awards dese ano.
O seu sinxelo He Said/She Said valeulle todo tipo de eloxios da crítica, que cualificou a esta estrela emerxente como "brillante, independente e destinada a dominar o mundo do soul e do blues". Esta canción tamén aparece no seu álbum recompilación The Craig Charles Trunk of Funk Volume 2.
A súa música foi incluída na playlist Spotify's Best Retro Songs de 2021 e na lista de reprodución das mellores cancións funk de 2022.
A súa interpretación excepcional da canción I Wish I Knew How I Would Feel To Be Free valeulle para integrar a banda sonora dun recente anuncio publicitario europeo dunha famosa multinacional de comida rápida.
O 13 de maio deste mesmo ano, Acantha fixo o seu debut na televisión estadounidense a nivel nacional, ofrecendo unha actuación impresionante no programa da CBS Saturday Morning, que incluíu tres temas: He Said / She Said, It's Gonna Be Alright e Sugar Woman.
O enorme talento de Acantha Lang valeulle para dispoñer en pouco tempo dunha lexión dedicada de fans a través da súa serie Standing On The Shoulders Of…Soul (actualmente máis de dez millóns de visitas acumuladas en Instagram, Youtube e TikTok), pero lonxe de acomodarse, continuou traballando sen descanso, e froito diso é o seu recente álbum titulado Beautiful Dreams, lanzado a principios deste verán.
O estilo narrativo das súas composicións inspírase nas antigas tradicións do blues do sur, pero toca temas contemporáneos, lanzando ataques frontais ás fake news, construíndo odas ao amor maternal tras o paso do furacán Katrina pola súa cidade natal, e celebrando a sororidade e a forza da feminidade, con confianza e orgullo.

FORMACIÓN: